ਬਿਹਾਰ ਦੇ ਬਕਸਰ 'ਚ ਕਾਰ ਤੇ ਮੋਟਰਸਾਈਕਲ ਵਿਚਾਲੇ ਭਿਆਨਕ ਟੱਕਰ, 6 ਨੌਜਵਾਨਾਂ ਦੀ ਮੌਤ
ਬਿਹਾਰ ਦੇ ਬਕਸਰ ਜ਼ਿਲ੍ਹੇ ਵਿੱਚ ਕੌਮੀ ਸ਼ਾਹਰਾਹ ਉੱਤੇ ਵਾਪਰੇ ਭਿਆਨਕ ਸੜਕ ਹਾਦਸੇ ਵਿੱਚ ਛੇ ਨੌਜਵਾਨਾਂ ਦੀ ਜਾਨ ਚਲੀ ਗਈ। ਮਰਨ ਵਾਲਿਆਂ ਵਿੱਚ ਤਿੰਨ ਕਾਰ ਸਵਾਰ ਅਤੇ ਤਿੰਨ ਮੋਟਰਸਾਈਕਲ ਸਵਾਰ ਸ਼ਾਮਲ ਹਨ।

ਬਿਹਾਰ ਦੇ ਬਕਸਰ ਜ਼ਿਲ੍ਹੇ ਵਿੱਚ ਵੀਰਵਾਰ ਦੇਰ ਸ਼ਾਮ ਵਾਪਰੇ ਇੱਕ ਭਿਆਨਕ ਸੜਕ ਹਾਦਸੇ ਵਿੱਚ ਛੇ ਜਣਿਆਂ ਦੀ ਮੌਤ ਹੋ ਗਈ। ਇਹ ਘਟਨਾ ਰਾਜਪੁਰ ਥਾਣੇ ਅਧੀਨ ਪੈਂਦੇ ਪਿੰਡ ਸੋਨਪਾ ਨੇੜੇ ਕੌਮੀ ਸ਼ਾਹਰਾਹ-319ਏ ਉੱਤੇ ਸਾਹਮਣੇ ਆਈ।
ਇੱਕ ਤੇਜ਼ ਰਫ਼ਤਾਰ ਕਾਰ ਨੇ ਅੱਗੇ ਜਾ ਰਹੇ ਮੋਟਰਸਾਈਕਲ ਨੂੰ ਪਿੱਛਿਓਂ ਜ਼ੋਰਦਾਰ ਟੱਕਰ ਮਾਰ ਦਿੱਤੀ। ਟੱਕਰ ਐਨੀ ਭਿਆਨਕ ਸੀ ਕਿ ਕਾਰ ਕਰੀਬ ਵੀਹ ਫੁੱਟ ਉੱਚੀ ਉੱਛਲ ਕੇ ਇੱਕ ਰੁੱਖ ਨਾਲ ਜਾ ਟਕਰਾਈ। ਹਾਦਸੇ ਮਗਰੋਂ ਇਲਾਕੇ ਵਿੱਚ ਹਫੜਾ-ਦਫੜੀ ਫੈਲ ਗਈ।
ਕਾਰ ਵਿੱਚ ਸਵਾਰ ਤਿੰਨੇ ਨੌਜਵਾਨਾਂ ਦੀ ਥਾਂ 'ਤੇ ਹੀ ਮੌਤ ਹੋ ਗਈ। ਉਨ੍ਹਾਂ ਦੀ ਸ਼ਨਾਖਤ 25 ਸਾਲਾ ਇਰਫਾਨ ਅੰਸਾਰੀ, 20 ਸਾਲਾ ਅਰਬਾਜ਼ ਅੰਸਾਰੀ ਅਤੇ 30 ਸਾਲਾ ਬਾਦਲ ਕੁਮਾਰ ਵਜੋਂ ਹੋਈ ਹੈ। ਇਹ ਸਾਰੇ ਉੱਤਰ ਪ੍ਰਦੇਸ਼ ਦੇ ਪਿੰਡ ਭਟੌਰਾ ਦੇ ਵਸਨੀਕ ਸਨ ਅਤੇ ਬਰਾਤ ਨਾਲ ਬਿਹਾਰ ਦੇ ਪਿੰਡ ਬਿਸ਼ਨਪੁਰ ਜਾ ਰਹੇ ਸਨ।
ਦੂਜੇ ਪਾਸੇ, ਮੋਟਰਸਾਈਕਲ ਉੱਤੇ ਸਵਾਰ 22 ਵਰ੍ਹਿਆਂ ਦੇ ਅਰੁਣ ਕੁਮਾਰ ਦੀ ਹਸਪਤਾਲ ਪਹੁੰਚ ਕੇ ਜ਼ਖ਼ਮਾਂ ਦੀ ਤਾਬ ਨਾ ਝੱਲਦਿਆਂ ਜਾਨ ਚਲੀ ਗਈ।
ਮੋਟਰਸਾਈਕਲ 'ਤੇ ਮੌਜੂਦ ਦੋ ਹੋਰ ਗੰਭੀਰ ਜ਼ਖ਼ਮੀਆਂ ਨੂੰ ਬਿਹਤਰ ਡਾਕਟਰੀ ਸਹਾਇਤਾ ਲਈ ਵਾਰਾਣਸੀ ਲਿਜਾਇਆ ਜਾ ਰਿਹਾ ਸੀ, ਪਰ ਉਨ੍ਹਾਂ ਨੇ ਰਾਹ ਵਿੱਚ ਹੀ ਦਮ ਤੋੜ ਦਿੱਤਾ। ਇਨ੍ਹਾਂ ਦੀ ਪਛਾਣ 21 ਸਾਲਾ ਸ਼ੁਭਮ ਕੁਮਾਰ ਅਤੇ 18 ਸਾਲਾ ਸ਼ਿਵਮ ਕੁਮਾਰ ਵਜੋਂ ਹੋਈ ਹੈ।
ਦੋਪਹੀਆ ਵਾਹਨ ਸਵਾਰ ਆਪਣੇ ਸਾਕ-ਸੰਬੰਧੀਆਂ ਦੇ ਘਰੋਂ ਥੋੜ੍ਹੀ ਦੂਰ ਹੀ ਰਵਾਨਾ ਹੋਏ ਸਨ ਅਤੇ ਮਹਿਜ਼ ਪੰਜਾਹ ਮੀਟਰ ਦਾ ਫ਼ਾਸਲਾ ਤੈਅ ਕਰਦਿਆਂ ਹੀ ਇਸ ਹਾਦਸੇ ਦੀ ਲਪੇਟ ਵਿੱਚ ਆ ਗਏ।



