ਵਿਦੇਸ਼ ਜਾਣ ਵਾਲੇ ਯਾਤਰੀਆਂ ਲਈ ਏਅਰ ਇੰਡੀਆ ਵੱਲੋਂ ਇੱਕ ਨਵੀਂ ਸਹੂਲਤ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਗਿਆ ਹੈ। ਹੁਣ ਅੰਤਰਰਾਸ਼ਟਰੀ ਯਾਤਰਾ ਕਰਨ ਵਾਲੇ ਯਾਤਰੀਆਂ ਨੂੰ ਵਿਦੇਸ਼ ਵਿੱਚ ਕਾਲਿੰਗ ਅਤੇ ਇੰਟਰਨੈੱਟ ਦੀ ਵਰਤੋਂ ਲਈ ਟ੍ਰੈਵਲ ਸਿਮ ਦੀ ਸਹੂਲਤ ਮਿਲੇਗੀ। ਏਅਰ ਇੰਡੀਆ ਨੇ ਇਸ ਸਰਵਿਸ ਲਈ ਟਾਟਾ ਕਮਿਊਨੀਕੇਸ਼ਨਜ਼ ਨਾਲ ਭਾਈਵਾਲੀ ਕੀਤੀ ਹੈ, ਜਿਸ ਤਹਿਤ ‘EasyRoam’ ਨਾਂ ਦੀ ਟ੍ਰੈਵਲ ਸਿਮ ਸਰਵਿਸ ਪੇਸ਼ ਕੀਤੀ ਗਈ ਹੈ।
ਏਅਰ ਇੰਡੀਆ ਵੱਲੋਂ 8 ਅਕਤੂਬਰ ਨੂੰ ਜਾਰੀ ਕੀਤੀ ਜਾਣਕਾਰੀ ਮੁਤਾਬਕ, EasyRoam ਦੇ ਤਹਿਤ ਯਾਤਰੀਆਂ ਨੂੰ ਫਿਜ਼ੀਕਲ ਸਿਮ ਕਾਰਡ ਦੇ ਨਾਲ-ਨਾਲ ਈ-ਸਿਮ ਦਾ ਵਿਕਲਪ ਵੀ ਮਿਲੇਗਾ। ਯਾਤਰੀ ਆਪਣੀ ਲੋੜ ਮੁਤਾਬਕ ਦੋਵਾਂ ਵਿੱਚੋਂ ਕੋਈ ਵੀ ਵਿਕਲਪ ਚੁਣ ਸਕਣਗੇ। ਇਸ ਲਈ ਏਅਰ ਇੰਡੀਆ ਦੀ ਬ੍ਰਾਂਡਿੰਗ ਵਾਲਾ ਖ਼ਾਸ ਵੈੱਬਪੇਜ ਉਪਲਬਧ ਕਰਵਾਇਆ ਜਾਵੇਗਾ।
ਇਸ ਸਰਵਿਸ ਦੀ ਖ਼ਾਸ ਗੱਲ ਇਹ ਹੈ ਕਿ ਸ਼ੁਰੂਆਤ ਵਿੱਚ ਸਿਮ ਕਾਰਡ ਮੁਫ਼ਤ ਦਿੱਤਾ ਜਾਵੇਗਾ। ਹਾਲਾਂਕਿ, ਇੱਥੇ ਇਹ ਗੱਲ ਧਿਆਨ ਦੇਣ ਵਾਲੀ ਹੈ ਕਿ ਸਿਮ ਮੁਫ਼ਤ ਹੋਣ ਦਾ ਮਤਲਬ ਕਾਲਿੰਗ ਅਤੇ ਇੰਟਰਨੈੱਟ ਸਰਵਿਸ ਵੀ ਮੁਫ਼ਤ ਹੋਣਾ ਨਹੀਂ ਹੈ। ਵਿਦੇਸ਼ ਵਿੱਚ ਵਾਇਸ ਕਾਲਿੰਗ ਅਤੇ ਡਾਟਾ ਦੀ ਵਰਤੋਂ ਕਰਨ ਲਈ ਯਾਤਰੀਆਂ ਨੂੰ ਇੰਟਰਨੈਸ਼ਨਲ ਰੋਮਿੰਗ ਪੈਕ ਖਰੀਦਣਾ ਪਵੇਗਾ।
ਫਿਲਹਾਲ EasyRoam ਸਰਵਿਸ ਦੀ ਸ਼ੁਰੂਆਤ ਦੁਨੀਆ ਦੇ 30 ਦੇਸ਼ਾਂ ਵਿੱਚ ਕੀਤੀ ਜਾ ਰਹੀ ਹੈ। ਇਨ੍ਹਾਂ ਵਿੱਚ ਉੱਤਰੀ ਅਮਰੀਕਾ, ਯੂਰਪ, ਬ੍ਰਿਟੇਨ, ਆਸਟ੍ਰੇਲੀਆ, ਏਸ਼ੀਆ-ਪੈਸੀਫਿਕ ਅਤੇ ਮਿਡਲ ਈਸਟ ਦੇ ਦੇਸ਼ ਸ਼ਾਮਲ ਹਨ। ਇਨ੍ਹਾਂ ਦੇਸ਼ਾਂ ਦੀ ਯਾਤਰਾ ਕਰਨ ਵਾਲੇ ਯਾਤਰੀ ਇਸ ਟ੍ਰੈਵਲ ਸਿਮ ਰਾਹੀਂ ਵਾਇਸ ਅਤੇ ਡਾਟਾ ਸਰਵਿਸ ਦੀ ਵਰਤੋਂ ਕਰ ਸਕਣਗੇ।
ਏਅਰ ਇੰਡੀਆ ਅਤੇ ਟਾਟਾ ਕਮਿਊਨੀਕੇਸ਼ਨਜ਼ ਦੋਵੇਂ ਟਾਟਾ ਗਰੁੱਪ ਦਾ ਹਿੱਸਾ ਹਨ। ਇਸ ਭਾਈਵਾਲੀ ਰਾਹੀਂ ਏਅਰ ਇੰਡੀਆ ਆਪਣੇ ਅੰਤਰਰਾਸ਼ਟਰੀ ਯਾਤਰੀਆਂ ਲਈ ਰੋਮਿੰਗ ਨਾਲ ਜੁੜੀ ਇਹ ਵਾਧੂ ਸਹੂਲਤ ਲੈ ਕੇ ਆਈ ਹੈ, ਜਿਸ ਨਾਲ ਵਿਦੇਸ਼ ਜਾਣ ਵਾਲੇ ਯਾਤਰੀਆਂ ਨੂੰ ਸਿਮ ਅਤੇ ਈ-ਸਿਮ ਵਿੱਚੋਂ ਆਪਣੀ ਪਸੰਦ ਦਾ ਵਿਕਲਪ ਚੁਣਨ ਦੀ ਸਹੂਲਤ ਮਿਲੇਗੀ।