LIVE TV
ਤਾਜ਼ਾ ਖ਼ਬਰਾਂ
ਸ਼ਨਿੱਚਰਵਾਰ, 21 ਨਵੰਬਰ 2026
ਦੇਸ਼

PM ਮੋਦੀ ਦੇ ਵਿਦੇਸ਼ੀ ਦੌਰੇ ਦੀ ਖ਼ਾਸ ਚਰਚਾ, ਟਰੰਪ ਤੋਂ ਲੈ ਕੇ ਜਾਪਾਨੀ PM ਤੱਕ ਨੂੰ ਦਿੱਤੇ ਭਾਰਤੀ ਤੋਹਫ਼ੇ

ਫਿਲੀਪੀਨਜ਼ ਦੌਰੇ ਦੌਰਾਨ PM ਨਰਿੰਦਰ ਮੋਦੀ ਨੇ ਟਰੰਪ, ਜਾਪਾਨੀ PM ਸਮੇਤ ਕਈ ਵਿਸ਼ਵ ਨੇਤਾਵਾਂ ਨੂੰ ਭਾਰਤ ਦੇ ਵੱਖ-ਵੱਖ ਸੂਬਿਆਂ ਦੀਆਂ ਰਵਾਇਤੀ ਕਲਾਵਾਂ ਨਾਲ ਜੁੜੇ ਖ਼ਾਸ ਤੋਹਫ਼ੇ ਭੇਟ ਕੀਤੇ। ਇਨ੍ਹਾਂ ਤੋਹਫ਼ਿਆਂ ਵਿੱਚ ਗੋਲਡਨ ਪਿਛਵਾਈ ਪੇਂਟਿੰਗ, ਬਨਾਰਸੀ ਸਿਲਕ, ਬਿਦਰੀਵੇਅਰ ਅਤੇ ਡੋਕਰਾ ਕਲਾ ਵਰਗੀਆਂ ਕਲਾਕ੍ਰਿਤੀਆਂ ਸ਼ਾਮਲ ਰਹੀਆਂ।

ਵਿਦੇਸ਼ੀ ਦੌਰਿਆਂ ਦੌਰਾਨ ਭਾਰਤ ਦੀ ਸੱਭਿਆਚਾਰਕ ਵਿਰਾਸਤ ਅਤੇ ਰਵਾਇਤੀ ਕਲਾਵਾਂ ਨੂੰ ਦੁਨੀਆ ਸਾਹਮਣੇ ਪੇਸ਼ ਕਰਨ ਦੀ ਆਪਣੀ ਕੋਸ਼ਿਸ਼ ਤਹਿਤ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਇਸ ਵਾਰ ਵੀ ਕਈ ਖ਼ਾਸ ਤੋਹਫ਼ੇ ਲੈ ਕੇ ਪਹੁੰਚੇ। ਫਿਲੀਪੀਨਜ਼ ਦੇ ਮਨੀਲਾ ਵਿੱਚ 16 ਅਤੇ 17 ਨਵੰਬਰ ਨੂੰ ਹੋਏ ਦੋ ਦਿਨਾਂ ਦੌਰੇ ਦੌਰਾਨ ਉਨ੍ਹਾਂ ਨੇ ਵੱਖ-ਵੱਖ ਦੇਸ਼ਾਂ ਦੇ ਪ੍ਰਮੁੱਖ ਨੇਤਾਵਾਂ ਨਾਲ ਮੁਲਾਕਾਤ ਕੀਤੀ ਅਤੇ ਉਨ੍ਹਾਂ ਨੂੰ ਭਾਰਤ ਦੇ ਵੱਖ-ਵੱਖ ਸੂਬਿਆਂ ਦੀਆਂ ਰਵਾਇਤੀ ਕਲਾਵਾਂ ਨਾਲ ਜੁੜੀਆਂ ਕਲਾਕ੍ਰਿਤੀਆਂ ਭੇਟ ਕੀਤੀਆਂ।

ਇਸ ਦੌਰੇ ਦੌਰਾਨ ਪ੍ਰਧਾਨ ਮੰਤਰੀ ਮੋਦੀ ਨੇ ਭਾਰਤ ਦੀ ਨੁਮਾਇੰਦਗੀ ਕਰਦਿਆਂ ਕਵਾਡ ਸੰਮੇਲਨ, ਆਸੀਆਨ ਸੰਮੇਲਨ ਅਤੇ ਪੂਰਬੀ ਏਸ਼ੀਆ ਸੰਮੇਲਨ ਵਿੱਚ ਹਿੱਸਾ ਲਿਆ। ਉਨ੍ਹਾਂ ਵੱਲੋਂ ਦਿੱਤੇ ਗਏ ਤੋਹਫ਼ਿਆਂ ਵਿੱਚ ਰਾਜਸਥਾਨ ਦੀ ਪਿਛਵਾਈ ਪੇਂਟਿੰਗ ਤੋਂ ਲੈ ਕੇ ਕਰਨਾਟਕ ਦੇ ਬਿਦਰੀਵੇਅਰ ਅਤੇ ਬਨਾਰਸੀ ਸਿਲਕ ਤੱਕ ਦੀ ਝਲਕ ਦੇਖਣ ਨੂੰ ਮਿਲੀ।

ਡੋਨਾਲਡ ਟਰੰਪ ਨੂੰ ਭੇਟ ਕੀਤੀ ਗੋਲਡਨ ਪਿਛਵਾਈ ਪੇਂਟਿੰਗ

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਪ੍ਰਧਾਨ ਮੰਤਰੀ ਮੋਦੀ ਨੇ ਰਾਜਸਥਾਨ ਦੇ ਨਾਥਦੁਆਰਾ ਦੀ ਮਸ਼ਹੂਰ 'ਗੋਲਡਨ ਪਿਛਵਾਈ' ਪੇਂਟਿੰਗ ਭੇਟ ਕੀਤੀ। ਇਹ ਰਵਾਇਤੀ ਕਲਾ ਆਪਣੀ ਬਾਰੀਕ ਕਾਰੀਗਰੀ, ਚਮਕੀਲੇ ਰੰਗਾਂ ਅਤੇ ਵਿਸਤ੍ਰਿਤ ਚਿੱਤਰਕਾਰੀ ਲਈ ਜਾਣੀ ਜਾਂਦੀ ਹੈ।


ਜਾਪਾਨੀ ਪ੍ਰਧਾਨ ਮੰਤਰੀ ਨੂੰ ਬਨਾਰਸੀ ਸਿਲਕ ਦਾ ਤੋਹਫ਼ਾ

ਜਾਪਾਨ ਦੀ ਪ੍ਰਧਾਨ ਮੰਤਰੀ ਸਨੇ ਤਾਕਾਚੀ ਨੂੰ ਮੋਦੀ ਨੇ 'ਸਾਧੇਲੀ' ਬਾਕਸ ਵਿੱਚ ਰੱਖਿਆ ਸ਼ਾਹੀ ਰਾਇਲ ਬਲੂ ਬਨਾਰਸੀ ਕਤਾਨ ਸਿਲਕ ਸਟੋਲ ਭੇਟ ਕੀਤਾ। ਇਹ ਤੋਹਫ਼ਾ ਭਾਰਤ ਦੀ ਰਵਾਇਤੀ ਬਨਾਰਸੀ ਬੁਣਾਈ ਕਲਾ ਦੀ ਖ਼ੂਬਸੂਰਤੀ ਨੂੰ ਦਰਸਾਉਂਦਾ ਹੈ।

ਆਸਟ੍ਰੇਲੀਆ ਦੇ PM ਨੂੰ ਜੈਪੁਰ ਬਲੂ ਪਾਟਰੀ

ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਨੂੰ ਰਾਜਸਥਾਨ ਦੀ ਮਸ਼ਹੂਰ 'ਜੈਪੁਰ ਬਲੂ ਪਾਟਰੀ' ਦੀ ਇੱਕ ਕਲਾਕ੍ਰਿਤੀ ਦਿੱਤੀ ਗਈ। ਇਹ ਕਲਾ ਆਪਣੀ ਵਿਸ਼ੇਸ਼ ਨੀਲੀ ਰੰਗਤ ਅਤੇ ਰਵਾਇਤੀ ਡਿਜ਼ਾਈਨਾਂ ਲਈ ਜਾਣੀ ਜਾਂਦੀ ਹੈ।

ਫਿਲੀਪੀਨਜ਼ ਦੇ ਰਾਸ਼ਟਰਪਤੀ ਨੂੰ ਬਿਦਰੀਵੇਅਰ ਦਾ ਫੁੱਲਦਾਨ

ਫਿਲੀਪੀਨਜ਼ ਦੇ ਰਾਸ਼ਟਰਪਤੀ ਨੂੰ ਕਰਨਾਟਕ ਦੇ ਬੀਦਰ ਵਿੱਚ ਤਿਆਰ ਕੀਤਾ ਗਿਆ ਚਾਂਦੀ ਦੀ ਨੱਕਾਸ਼ੀ ਵਾਲਾ 'ਬਿਦਰੀਵੇਅਰ' ਫੁੱਲਦਾਨ ਭੇਟ ਕੀਤਾ ਗਿਆ। ਇਹ ਕਲਾਕ੍ਰਿਤੀ ਬੀਦਰ ਦੀ ਰਵਾਇਤੀ ਧਾਤੂ ਕਲਾ ਅਤੇ ਕਾਰੀਗਰੀ ਦੀ ਖ਼ਾਸ ਪਛਾਣ ਹੈ।

ਲਾਓਸ ਦੇ PM ਨੂੰ ਗੁਲਾਬੀ ਕੁਆਰਟਜ਼ ਦਾ ਹਾਥੀ

ਲਾਓਸ ਦੇ ਪ੍ਰਧਾਨ ਮੰਤਰੀ ਸੋਨੇਕਸੇ ਸਿਫੰਡੋਨ ਨੂੰ ਸੋਨੇ ਦੇ ਕੰਮ ਵਾਲਾ 'ਰੋਜ਼ ਕੁਆਰਟਜ਼' ਪੱਥਰ ਦਾ ਹਾਥੀ ਭੇਟ ਕੀਤਾ ਗਿਆ। ਇਹ ਸਜਾਵਟੀ ਕਲਾਕ੍ਰਿਤੀ ਕੁਦਰਤੀ ਗੁਲਾਬੀ ਕੁਆਰਟਜ਼ ਪੱਥਰ ਨੂੰ ਤਰਾਸ਼ ਕੇ ਤਿਆਰ ਕੀਤੀ ਗਈ ਹੈ।

ਇੰਡੋਨੇਸ਼ੀਆ ਦੇ ਰਾਸ਼ਟਰਪਤੀ ਨੂੰ ਚੋਲ ਯੁੱਗ ਦੀ ਕਾਂਸੀ ਦੀ ਮੂਰਤੀ

ਇੰਡੋਨੇਸ਼ੀਆ ਦੇ ਰਾਸ਼ਟਰਪਤੀ ਪ੍ਰਬੋਵੋ ਸੁਬਿਆਂਤੋ ਨੂੰ ਚੋਲ ਰਾਜਵੰਸ਼ ਦੇ ਸਮੇਂ ਦੀ ਕਲਾ ਤੋਂ ਪ੍ਰੇਰਿਤ ਇੱਕ ਰਵਾਇਤੀ ਕਾਂਸੀ ਦੀ ਮੂਰਤੀ ਦਿੱਤੀ ਗਈ। ਇਹ ਮੂਰਤੀਆਂ ਦੱਖਣੀ ਭਾਰਤ ਦੀ ਪ੍ਰਾਚੀਨ ਮੂਰਤੀਕਲਾ ਦੀ ਵਿਰਾਸਤ ਨੂੰ ਦਰਸਾਉਂਦੀਆਂ ਹਨ। ਇਨ੍ਹਾਂ ਨੂੰ 'ਮਧੂਛਿਸ਼ਠ ਵਿਧਾਨ' ਨਾਮਕ ਰਵਾਇਤੀ ਤਕਨੀਕ ਨਾਲ ਤਿਆਰ ਕੀਤਾ ਜਾਂਦਾ ਹੈ।

ਕੰਬੋਡੀਆ ਦੇ PM ਨੂੰ ਡੋਕਰਾ ਕਲਾ ਦੀ ਕਿਸ਼ਤੀ

ਕੰਬੋਡੀਆ ਦੇ ਪ੍ਰਧਾਨ ਮੰਤਰੀ ਹੁਨ ਮਾਨੇਤ ਨੂੰ ਡੋਕਰਾ ਕਲਾ ਨਾਲ ਤਿਆਰ ਕੀਤੀ ਗਈ ਇੱਕ ਰਵਾਇਤੀ ਕਿਸ਼ਤੀ ਭੇਟ ਕੀਤੀ ਗਈ। ਇਹ ਭਾਰਤ ਦੀ ਪ੍ਰਾਚੀਨ ਧਾਤੂ ਸ਼ਿਲਪਕਾਰੀ ਹੈ, ਜਿਸ ਵਿੱਚ ਲਾਸਟ-ਵੈਕਸ ਕਾਸਟਿੰਗ ਤਕਨੀਕ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਸ ਕਲਾ ਦੀ ਪਰੰਪਰਾ ਹਜ਼ਾਰਾਂ ਸਾਲ ਪੁਰਾਣੀ ਮੰਨੀ ਜਾਂਦੀ ਹੈ।

ਥਾਈਲੈਂਡ ਦੇ PM ਨੂੰ ਕੱਛ ਦੀ ਰੋਗਨ ਕਲਾ ਦੀ ਪੇਂਟਿੰਗ

ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ ਅਨੁਤਿਨ ਚਰਨਵੀਰਕੁਲ ਨੂੰ ਗੁਜਰਾਤ ਦੇ ਕੱਛ ਦੀ ਮਸ਼ਹੂਰ ਰੋਗਨ ਕਲਾ ਨਾਲ ਤਿਆਰ ਕੀਤੀ ਪੇਂਟਿੰਗ ਦਿੱਤੀ ਗਈ। ਇਹ ਸਦੀਆਂ ਪੁਰਾਣੀ ਟੈਕਸਟਾਈਲ ਪੇਂਟਿੰਗ ਕਲਾ ਹੈ, ਜਿਸ ਨੂੰ ਕੱਛ ਦੇ ਨਿਰੋਨਾ ਪਿੰਡ ਦੇ ਕੁਝ ਕਾਰੀਗਰ ਪਰਿਵਾਰ ਅੱਜ ਵੀ ਸੰਭਾਲ ਰਹੇ ਹਨ।

ਤਿਮੋਰ-ਲੇਸਟੇ ਦੇ PM ਨੂੰ ਅਗੇਟ ਬਾਊਲ

ਤਿਮੋਰ-ਲੇਸਟੇ ਦੇ ਪ੍ਰਧਾਨ ਮੰਤਰੀ ਕੇ. ਰਾਲਾ ਜਨਾਨਾ ਗੁਸਮਾਓ ਨੂੰ ਗੁਜਰਾਤ ਦੇ ਖੰਭਾਤ ਵਿੱਚ ਹੱਥ ਨਾਲ ਤਿਆਰ ਕੀਤਾ ਗਿਆ 'ਅਗੇਟ ਬਾਊਲ' ਭੇਟ ਕੀਤਾ ਗਿਆ। ਇਹ ਅਕੀਕ ਨਾਮਕ ਅਰਧ-ਕੀਮਤੀ ਪੱਥਰ ਤੋਂ ਬਣਾਇਆ ਜਾਂਦਾ ਹੈ, ਜਿਸ ਦੀਆਂ ਕੁਦਰਤੀ ਧਾਰੀਆਂ ਅਤੇ ਰੰਗ ਇਸ ਨੂੰ ਵਿਲੱਖਣ ਦਿੱਖ ਦਿੰਦੇ ਹਨ।

ਵੀਅਤਨਾਮ ਦੇ PM ਨੂੰ ਰਵਾਇਤੀ ਕੰਧ ਸਜਾਵਟੀ ਕਲਾਕ੍ਰਿਤੀ

ਵੀਅਤਨਾਮ ਦੇ ਪ੍ਰਧਾਨ ਮੰਤਰੀ ਲੇ ਮਿਨਹ ਹੰਗ ਨੂੰ ਮੋਦੀ ਨੇ ਹੱਥ ਨਾਲ ਤਿਆਰ ਕੀਤੀ ਇੱਕ ਰਵਾਇਤੀ ਕੰਧ ਸਜਾਵਟੀ ਕਲਾਕ੍ਰਿਤੀ ਭੇਟ ਕੀਤੀ। ਇਹ ਕਲਾਕ੍ਰਿਤੀ ਪ੍ਰੋਸੈਸ ਕੀਤੇ ਚਮੜੇ ਨਾਲ ਤਿਆਰ ਕੀਤੀ ਜਾਂਦੀ ਹੈ ਅਤੇ ਭਾਰਤ ਦੀ ਲੋਕ ਕਲਾ ਤੇ ਰਵਾਇਤੀ ਕਾਰੀਗਰੀ ਦੀ ਝਲਕ ਪੇਸ਼ ਕਰਦੀ ਹੈ।

ਇਨ੍ਹਾਂ ਤੋਹਫ਼ਿਆਂ ਰਾਹੀਂ ਪ੍ਰਧਾਨ ਮੰਤਰੀ ਮੋਦੀ ਨੇ ਵੱਖ-ਵੱਖ ਦੇਸ਼ਾਂ ਦੇ ਨੇਤਾਵਾਂ ਨੂੰ ਭਾਰਤ ਦੇ ਵੱਖਰੇ ਸੂਬਿਆਂ ਦੀ ਕਲਾ, ਕਾਰੀਗਰੀ ਅਤੇ ਸੱਭਿਆਚਾਰਕ ਵਿਰਾਸਤ ਨਾਲ ਜਾਣੂ ਕਰਵਾਇਆ।