LIVE TV
ਤਾਜ਼ਾ ਖ਼ਬਰਾਂ
ਸ਼ਨਿੱਚਰਵਾਰ, 21 ਨਵੰਬਰ 2026
ਪੰਜਾਬ

ਅੰਮ੍ਰਿਤਸਰ ਵਿੱਚ ਸਕੂਲੀ ਬੱਚੀ ਨੂੰ ਟੱਕਰ ਮਾਰਨ ਵਾਲਾ ਪੁਲਿਸ ਮੁਲਾਜ਼ਮ ਹਿਰਾਸਤ ਵਿੱਚ ਲਿਆ

ਅੰਮ੍ਰਿਤਸਰ ਦੇ ਸੁਲਤਾਨਵਿੰਡ ਰੋਡ 'ਤੇ ਸਕੂਲੋਂ ਮੁੜ ਰਹੀ 12 ਸਾਲਾ ਬੱਚੀ ਨੂੰ ਕਾਰ ਨੇ ਟੱਕਰ ਮਾਰ ਦਿੱਤੀ। ਲੋਕਾਂ ਨੇ ਗੱਡੀ ਚਲਾ ਰਹੇ ਹੌਲਦਾਰ 'ਤੇ ਨਸ਼ੇ ਵਿੱਚ ਹੋਣ ਦਾ ਦੋਸ਼ ਲਾ ਕੇ ਉਸ ਨੂੰ ਪੁਲਿਸ ਨੂੰ ਸੌਂਪ ਦਿੱਤਾ।

ਅੰਮ੍ਰਿਤਸਰ ਵਿੱਚ ਸਕੂਲੀ ਬੱਚੀ ਨੂੰ ਟੱਕਰ ਮਾਰਨ ਵਾਲਾ ਪੁਲਿਸ ਮੁਲਾਜ਼ਮ ਹਿਰਾਸਤ ਵਿੱਚ ਲਿਆ
ਪੰਜਾਬ ਟੈਲੀਵਿਜ਼ਨ

ਅੰਮ੍ਰਿਤਸਰ ਦੇ ਸੁਲਤਾਨਵਿੰਡ ਰੋਡ ਉੱਤੇ ਸਕੂਲ ਤੋਂ ਛੁੱਟੀ ਹੋਣ ਮਗਰੋਂ ਘਰ ਜਾ ਰਹੀ 12 ਸਾਲਾਂ ਦੀ ਬੱਚੀ ਨੂੰ ਇੱਕ ਬੇਕਾਬੂ ਆਲਟੋ ਕਾਰ ਨੇ ਫੇਟ ਮਾਰ ਦਿੱਤੀ। ਇਸ ਹਾਦਸੇ ਵਿੱਚ ਬੱਚੀ ਗੱਡੀ ਥੱਲੇ ਦਬ ਗਈ, ਜਿਸ ਨੂੰ ਉੱਥੋਂ ਲੰਘ ਰਹੇ ਲੋਕਾਂ ਨੇ ਮੁਸ਼ੱਕਤ ਨਾਲ ਬਾਹਰ ਕੱਢ ਕੇ ਇਲਾਜ ਵਾਸਤੇ ਹਸਪਤਾਲ ਦਾਖ਼ਲ ਕਰਵਾਇਆ।

ਕਾਰ ਚਲਾ ਰਹੇ ਮੁਲਾਜ਼ਮ ਦਾ ਨਾਂ ਹੌਲਦਾਰ ਅੰਮ੍ਰਿਤਪਾਲ ਸਿੰਘ ਦੱਸਿਆ ਗਿਆ ਹੈ। ਘਟਨਾ ਵੇਲੇ ਹਾਜ਼ਰ ਅੰਬੇਡਕਰ ਸਮਾਜ ਦਲ ਦੇ ਨੌਜਵਾਨ ਆਗੂ ਰਾਹੁਲ ਸੋਰੀ ਅਤੇ ਹੋਰਨਾਂ ਚਸ਼ਮਦੀਦਾਂ ਨੇ ਇਲਜ਼ਾਮ ਲਾਇਆ ਕਿ ਹੌਲਦਾਰ ਸ਼ਰਾਬ ਦੇ ਨਸ਼ੇ ਕਾਰਨ ਆਪਣੇ ਪੈਰਾਂ 'ਤੇ ਸੰਭਲ ਵੀ ਨਹੀਂ ਰਿਹਾ ਸੀ।

ਜਥੇਬੰਦੀ ਦੇ ਸੂਬਾਈ ਚੇਅਰਮੈਨ ਵਿੱਕੀ ਨੇ ਦੱਸਿਆ ਕਿ ਟੱਕਰ ਮਾਰਨ ਮਗਰੋਂ ਕਾਰ ਚਾਲਕ ਨੇ ਖਿਸਕਣ ਦੀ ਕੋਸ਼ਿਸ਼ ਕੀਤੀ, ਪਰ ਆਲੇ-ਦੁਆਲੇ ਮੌਜੂਦ ਨੌਜਵਾਨਾਂ ਨੇ ਘੇਰਾ ਘੱਤ ਕੇ ਉਸ ਨੂੰ ਫੜ ਲਿਆ ਅਤੇ ਸੁਲਤਾਨਵਿੰਡ ਚੌਕੀ ਨੂੰ ਸੌਂਪ ਦਿੱਤਾ। ਲੋਕਾਂ ਅਨੁਸਾਰ ਜਦੋਂ ਗੱਡੀ ਅੰਦਰ ਵੇਖਿਆ ਗਿਆ ਤਾਂ ਉੱਥੋਂ ਸ਼ਰਾਬ ਦੀ ਬੋਤਲ, ਲਾਈਟਰ ਅਤੇ ਸਿਗਰਟਾਂ ਮਿਲੀਆਂ।

ਬੱਚੀ ਦੀ ਸਾਂਭ ਕਰ ਰਹੀ ਉਸ ਦੀ ਭੂਆ ਪ੍ਰੀਤੀ ਨੇ ਦੱਸਿਆ ਕਿ ਉਸ ਦੇ ਮਾਤਾ-ਪਿਤਾ ਅਤੇ ਦਾਦਾ-ਦਾਦੀ ਦਾ ਦੇਹਾਂਤ ਹੋ ਚੁੱਕਾ ਹੈ। ਗ਼ਰੀਬੀ ਵਿੱਚ ਰਹਿ ਰਹੇ ਇਸ ਟੱਬਰ ਦੇ ਕਈ ਜੀਅ ਦਿਵਿਆਂਗ ਹਨ, ਜਿਸ ਕਰਕੇ ਉਨ੍ਹਾਂ ਲਈ ਇਲਾਜ ਦਾ ਖ਼ਰਚ ਚੁੱਕਣਾ ਔਖਾ ਹੈ। ਪਰਿਵਾਰ ਨੇ ਮੰਗ ਰੱਖੀ ਹੈ ਕਿ ਪ੍ਰਸ਼ਾਸਨ ਇਲਾਜ ਦੀ ਜ਼ਿੰਮੇਵਾਰੀ ਲਵੇ ਅਤੇ ਹੌਲਦਾਰ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਦਿਆਂ ਉਸ ਨੂੰ ਮੁਅੱਤਲ ਕਰੇ।

ਸੁਲਤਾਨਵਿੰਡ ਚੌਕੀ ਦੀ ਪੁਲਿਸ ਨੇ ਘਟਨਾ ਵਾਲੀ ਥਾਂ 'ਤੇ ਪਹੁੰਚ ਕੇ ਕਾਰ ਜ਼ਬਤ ਕਰ ਲਈ ਅਤੇ ਮੁਲਾਜ਼ਮ ਨੂੰ ਹਿਰਾਸਤ 'ਚ ਲੈ ਲਿਆ ਹੈ। ਪੁਲਿਸ ਅਧਿਕਾਰੀਆਂ ਅਨੁਸਾਰ ਹੌਲਦਾਰ ਦੀ ਡਾਕਟਰੀ ਜਾਂਚ ਕਰਵਾਈ ਜਾ ਰਹੀ ਹੈ ਤਾਂ ਜੋ ਨਸ਼ੇ ਬਾਰੇ ਪੁਸ਼ਟੀ ਹੋ ਸਕੇ। ਉਨ੍ਹਾਂ ਕਿਹਾ ਕਿ ਰਿਪੋਰਟ ਅਤੇ ਸਾਹਮਣੇ ਆਏ ਤੱਥਾਂ ਮੁਤਾਬਕ ਵਿਭਾਗੀ ਅਤੇ ਕਾਨੂੰਨੀ ਕਦਮ ਚੁੱਕੇ ਜਾਣਗੇ।

ਅਦਾਲਤ ਵਿੱਚ ਹਾਲੇ ਕੋਈ ਦੋਸ਼ ਸਾਬਤ ਨਹੀਂ ਹੋਇਆ।

ਅਹਿਮ ਘਟਨਾਕ੍ਰਮ

  • ਸੁਲਤਾਨਵਿੰਡ ਰੋਡ 'ਤੇ ਸਕੂਲੋਂ ਪਰਤ ਰਹੀ ਬੱਚੀ ਕਾਰ ਹੇਠ ਆਈ
  • ਰਾਹਗੀਰਾਂ ਨੇ ਕਾਰ ਚਾਲਕ ਹੌਲਦਾਰ ਅੰਮ੍ਰਿਤਪਾਲ ਸਿੰਘ ਨੂੰ ਮੌਕੇ 'ਤੇ ਫੜਿਆ
  • ਕਾਰ ਵਿੱਚੋਂ ਸ਼ਰਾਬ ਦੀ ਬੋਤਲ ਅਤੇ ਸਿਗਰਟਾਂ ਮਿਲਣ ਦਾ ਦਾਅਵਾ
  • ਪੁਲਿਸ ਨੇ ਕਾਰ ਜ਼ਬਤ ਕਰ ਕੇ ਮੁਲਾਜ਼ਮ ਦੀ ਡਾਕਟਰੀ ਜਾਂਚ ਸ਼ੁਰੂ ਕੀਤੀ