ਭਾਰਤੀ ਟੀਮ ਵੈਸਟਇੰਡੀਜ਼ ਖ਼ਿਲਾਫ਼ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ਵਿੱਚ ਕਲੀਨ ਸਵੀਪ ਕਰਨ ਤੋਂ ਖੁੰਝ ਗਈ ਹੈ। ਨਿਊ ਚੰਡੀਗੜ੍ਹ ਵਿੱਚ ਖੇਡੇ ਗਏ ਤੀਜੇ ਵਨਡੇ ਵਿੱਚ ਵੈਸਟਇੰਡੀਜ਼ ਨੇ ਭਾਰਤ ਨੂੰ 5 ਵਿਕਟਾਂ ਨਾਲ ਹਰਾ ਕੇ ਸੀਰੀਜ਼ ਵਿੱਚ ਇੱਕ ਮੈਚ ਆਪਣੇ ਨਾਮ ਕੀਤਾ। ਭਾਰਤੀ ਟੀਮ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 50 ਓਵਰਾਂ ਵਿੱਚ 351 ਦੌੜਾਂ ਬਣਾਈਆਂ ਸਨ, ਪਰ ਵੈਸਟਇੰਡੀਜ਼ ਦੇ ਕਪਤਾਨ ਸ਼ਾਈ ਹੋਪ ਦੀ ਸ਼ਾਨਦਾਰ ਅਜੇਤੂ 162 ਦੌੜਾਂ ਦੀ ਪਾਰੀ ਨੇ ਭਾਰਤ ਦੀ ਜਿੱਤ ਦੀ ਉਮੀਦ ’ਤੇ ਪਾਣੀ ਫੇਰ ਦਿੱਤਾ।
ਮੈਚ ਤੋਂ ਬਾਅਦ ਭਾਰਤੀ ਕਪਤਾਨ ਸ਼ੁਭਮਨ ਗਿੱਲ ਨੇ ਟੀਮ ਦੀ ਹਾਰ ਦੇ ਕਾਰਨਾਂ ’ਤੇ ਗੱਲ ਕਰਦਿਆਂ ਮਾੜੀ ਫੀਲਡਿੰਗ ਅਤੇ ਡੈਥ ਓਵਰਾਂ ਦੀ ਗੇਂਦਬਾਜ਼ੀ ਨੂੰ ਵੱਡੀ ਚਿੰਤਾ ਦੱਸਿਆ। ਗਿੱਲ ਮੁਤਾਬਕ, ਪੂਰੀ ਸੀਰੀਜ਼ ਦੌਰਾਨ ਭਾਰਤੀ ਟੀਮ ਨੇ ਲਗਭਗ ਛੇ ਜਾਂ ਸੱਤ ਕੈਚ ਛੱਡੇ, ਜੋ ਆਉਣ ਵਾਲੇ ਵਿਸ਼ਵ ਕੱਪ ਤੋਂ ਪਹਿਲਾਂ ਚੰਗਾ ਸੰਕੇਤ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਡੈਥ ਓਵਰਾਂ ਵਿੱਚ ਗੇਂਦਬਾਜ਼ੀ ’ਚ ਵੀ ਸੁਧਾਰ ਕਰਨ ਦੀ ਲੋੜ ਹੈ।
ਗਿੱਲ ਨੇ ਇਹ ਵੀ ਕਿਹਾ ਕਿ ਡੈਥ ਓਵਰਾਂ ਦੌਰਾਨ ਕਈ ਵਾਰ ਟੀਮ ਇਸ ਗੱਲ ਨੂੰ ਲੈ ਕੇ ਪੂਰੀ ਤਰ੍ਹਾਂ ਸਪੱਸ਼ਟ ਨਹੀਂ ਰਹੀ ਕਿ ਉਸ ਨੂੰ ਹਮਲਾਵਰ ਰਣਨੀਤੀ ਅਪਣਾਉਣੀ ਹੈ ਜਾਂ ਬਚਾਅ ਵਾਲੀ। ਉਨ੍ਹਾਂ ਦੇ ਮੁਤਾਬਕ, ਜਦੋਂ ਵਿਰੋਧੀ ਟੀਮ ਦੀਆਂ ਪੰਜ ਜਾਂ ਛੇ ਵਿਕਟਾਂ ਡਿੱਗ ਚੁੱਕੀਆਂ ਹੋਣ ਤਾਂ ਫੀਲਡਿੰਗ ਸੈਟਿੰਗ ਅਤੇ ਗੇਂਦਬਾਜ਼ੀ ਦੀ ਰਣਨੀਤੀ ਨੂੰ ਲੈ ਕੇ ਸਹੀ ਫੈਸਲਾ ਕਰਨਾ ਜ਼ਰੂਰੀ ਹੁੰਦਾ ਹੈ।
ਭਾਰਤੀ ਕਪਤਾਨ ਨੇ ਕਿਹਾ ਕਿ ਸੀਰੀਜ਼ ਦੌਰਾਨ ਟੀਮ ਨੇ ਕਈ ਚੰਗੀਆਂ ਚੀਜ਼ਾਂ ਵੀ ਕੀਤੀਆਂ ਹਨ, ਪਰ ਅਜੇ ਵੀ ਕੁਝ ਕਮੀਆਂ ’ਤੇ ਕੰਮ ਕਰਨ ਦੀ ਲੋੜ ਹੈ। ਉਨ੍ਹਾਂ ਮੰਨਿਆ ਕਿ ਤੀਜਾ ਵਨਡੇ ਇੱਕ ਸਮੇਂ ਭਾਰਤ ਦੇ ਕੰਟਰੋਲ ਵਿੱਚ ਸੀ, ਪਰ ਤ੍ਰੇਲ ਕਾਰਨ ਟੀਮ ਲਗਭਗ ਚਾਰ ਓਵਰ ਪਿੱਛੇ ਰਹਿ ਗਈ ਅਤੇ ਵੈਸਟਇੰਡੀਜ਼ ਨੇ ਆਖਰੀ ਓਵਰਾਂ ਵਿੱਚ ਮੈਚ ਆਪਣੇ ਹੱਕ ਵਿੱਚ ਕਰ ਲਿਆ।
ਇਸ ਮੈਚ ਵਿੱਚ ਖੁਦ ਸਿਰਫ਼ ਇੱਕ ਦੌੜ ਬਣਾ ਕੇ ਆਊਟ ਹੋਣ ਬਾਰੇ ਸ਼ੁਭਮਨ ਗਿੱਲ ਨੇ ਕਿਹਾ ਕਿ ਜਲਦੀ ਆਊਟ ਹੋਣਾ ਹਮੇਸ਼ਾ ਨਿਰਾਸ਼ਾਜਨਕ ਹੁੰਦਾ ਹੈ। ਹਾਲਾਂਕਿ, ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਨਹੀਂ ਲੱਗਦਾ ਕਿ ਜਿਸ ਗੇਂਦ ’ਤੇ ਉਹ ਆਊਟ ਹੋਏ, ਉਸ ’ਤੇ ਉਹ ਇਸ ਤੋਂ ਵੱਧ ਕੁਝ ਕਰ ਸਕਦੇ ਸਨ।
ਤੀਜੇ ਵਨਡੇ ਵਿੱਚ ਮਿਲੀ ਹਾਰ ਦੇ ਬਾਵਜੂਦ ਭਾਰਤ ਨੇ ਤਿੰਨ ਮੈਚਾਂ ਦੀ ਸੀਰੀਜ਼ 2-1 ਨਾਲ ਆਪਣੇ ਨਾਮ ਕੀਤੀ। ਹੁਣ ਟੀਮ ਦੀ ਨਜ਼ਰ ਆਉਣ ਵਾਲੀਆਂ ਵਨਡੇ ਮੁਕਾਬਲਿਆਂ ਅਤੇ ਵਿਸ਼ਵ ਕੱਪ ਦੀਆਂ ਤਿਆਰੀਆਂ ’ਤੇ ਹੋਵੇਗੀ, ਜਿੱਥੇ ਫੀਲਡਿੰਗ ਅਤੇ ਡੈਥ ਓਵਰਾਂ ਦੀ ਗੇਂਦਬਾਜ਼ੀ ਵਰਗੇ ਪਹਿਲੂ ਭਾਰਤੀ ਟੀਮ ਲਈ ਅਹਿਮ ਰਹਿਣਗੇ।