ਪਾਕਿਸਤਾਨ ਨੇ ਪਾਲਕੀ ਸਾਹਿਬ ਨੂੰ ਸਰਹੱਦ ਪਾਰ ਲਿਜਾਣ ਦੀ ਨਹੀਂ ਦਿੱਤੀ ਪ੍ਰਵਾਨਗੀ
ਅਟਾਰੀ-ਵਾਹਗਾ ਸਰਹੱਦ ਰਸਤੇ ਪਾਕਿਸਤਾਨ ਦੇ ਗੁਰਦੁਆਰਾ ਸਾਹਿਬ ਲਈ ਭੇਜੀ ਗਈ ਪਾਲਕੀ ਸਾਹਿਬ ਨੂੰ ਪਾਕਿਸਤਾਨੀ ਅਧਿਕਾਰੀਆਂ ਦੇ ਇਨਕਾਰ ਮਗਰੋਂ ਵਾਪਸ ਭਾਰਤ ਮੋੜ ਲਿਆਂਦਾ ਗਿਆ।
ਅਟਾਰੀ-ਵਾਹਗਾ ਸਰਹੱਦ ਰਸਤੇ ਪਾਕਿਸਤਾਨ ਸਥਿਤ ਗੁਰਦੁਆਰਾ ਸਾਹਿਬ ਲਈ ਭੇਜੀ ਗਈ ਪਾਲਕੀ ਸਾਹਿਬ ਨੂੰ ਪਾਕਿਸਤਾਨੀ ਅਧਿਕਾਰੀਆਂ ਨੇ ਦਾਖ਼ਲੇ ਦੀ ਮਨਜ਼ੂਰੀ ਨਹੀਂ ਦਿੱਤੀ। ਅਧਿਕਾਰੀਆਂ ਦੇ ਇਨਕਾਰ ਮਗਰੋਂ ਪਾਲਕੀ ਸਾਹਿਬ ਵਾਲਾ ਟਰੱਕ ਵਾਪਸ ਭਾਰਤ ਪਰਤ ਆਇਆ ਹੈ।
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪ੍ਰਕਾਸ਼ ਵਾਸਤੇ ਤਿਆਰ ਕੀਤੀ ਗਈ ਇਸ ਪਾਲਕੀ ਸਾਹਿਬ ਨੂੰ ਵਿਸ਼ੇਸ਼ ਗੱਡੀ ਰਾਹੀਂ ਅੰਤਰਰਾਸ਼ਟਰੀ ਸਰਹੱਦ ਤੱਕ ਪਹੁੰਚਾਇਆ ਗਿਆ ਸੀ। ਭਾਰਤੀ ਅਧਿਕਾਰੀਆਂ ਵੱਲੋਂ ਇਸ ਨੂੰ ਸਰਹੱਦ ਪਾਰ ਭੇਜਣ ਲਈ ਲੋੜੀਂਦੀਆਂ ਸਾਰੀਆਂ ਕਾਗ਼ਜ਼ੀ ਤੇ ਕਸਟਮ ਰਸਮਾਂ ਮੁਕੰਮਲ ਕਰ ਲਈਆਂ ਗਈਆਂ ਸਨ।
ਸਰਹੱਦ ਉੱਤੇ ਪੁੱਜਣ ਮਗਰੋਂ ਪਾਕਿਸਤਾਨ ਦੇ ਕਸਟਮ ਅਧਿਕਾਰੀਆਂ ਨੇ ਲੋੜੀਂਦੀ ਪ੍ਰਵਾਨਗੀ ਹਾਸਲ ਕਰਨ ਦਾ ਹਵਾਲਾ ਦੇ ਕੇ ਵਕਤ ਮੰਗਿਆ। ਇਸ ਕਾਰਨ ਪਾਲਕੀ ਸਾਹਿਬ ਦੇ ਨਾਲ ਆਏ ਅਮਲੇ ਨੂੰ ਉੱਥੇ ਕਈ ਘੰਟੇ ਠਹਿਰਨਾ ਪਿਆ।
ਲੰਮੀ ਉਡੀਕ ਮਗਰੋਂ ਆਖ਼ਰਕਾਰ ਪਾਕਿਸਤਾਨੀ ਅਧਿਕਾਰੀਆਂ ਨੇ ਪਾਲਕੀ ਸਾਹਿਬ ਨੂੰ ਆਪਣੇ ਮੁਲਕ ਵਿੱਚ ਦਾਖ਼ਲ ਕਰਨ ਤੋਂ ਕੋਰੀ ਨਾਂਹ ਕਰ ਦਿੱਤੀ। ਇਸ ਫ਼ੈਸਲੇ ਕਾਰਨ ਪਾਲਕੀ ਸਾਹਿਬ ਨੂੰ ਲੈ ਕੇ ਆਈ ਗੱਡੀ ਮੁੜ ਭਾਰਤੀ ਖੇਤਰ ਵਿੱਚ ਪਰਤ ਆਈ।
