ਐੱਚ-1ਬੀ ਵੀਜ਼ਾ ਦੀ 60 ਦਿਨਾਂ ਦੀ ਮੋਹਲਤ ਖ਼ਤਮ ਕਰਨ ਦੀ ਤਜਵੀਜ਼ ’ਤੇ ਹਜ਼ਾਰਾਂ ਪ੍ਰਤੀਕਰਮ

ਅਮਰੀਕਾ ਵਿੱਚ ਨੌਕਰੀ ਗੁਆ ਚੁੱਕੇ ਐੱਚ-1ਬੀ ਵੀਜ਼ਾ ਧਾਰਕਾਂ ਦੀ 60 ਦਿਨਾਂ ਦੀ ਮੋਹਲਤ (ਗ੍ਰੇਸ ਪੀਰੀਅਡ) ਖ਼ਤਮ ਕਰਨ ਦੀ ਸਰਕਾਰੀ ਤਜਵੀਜ਼ ’ਤੇ ਮੰਗਲਵਾਰ ਰਾਤ ਤੱਕ 31,383 ਜਨਤਕ ਟਿੱਪਣੀਆਂ ਦਰਜ ਹੋ ਚੁੱਕੀਆਂ ਹਨ। ਇਸ ਕਦਮ ਨਾਲ ਅਮਰੀਕਾ ਵਿੱਚ ਕੰਮ ਕਰਦੇ ਹਜ਼ਾਰਾਂ ਵਿਦੇਸ਼ੀ ਮਾਹਿਰਾਂ, ਖ਼ਾਸ ਤੌਰ 'ਤੇ ਭਾਰਤੀ ਪੇਸ਼ੇਵਰਾਂ ਵਿੱਚ ਚਿੰਤਾ ਵਧ ਗਈ ਹੈ।

ਡਿਪਾਰਟਮੈਂਟ ਆਫ਼ ਹੋਮਲੈਂਡ ਸਕਿਓਰਿਟੀ (DHS) ਨੇ ਇਹ ਤਜਵੀਜ਼ ਬੀਤੀ 11 ਸਤੰਬਰ ਨੂੰ ਜਨਤਕ ਕੀਤੀ ਸੀ। ਮੌਜੂਦਾ ਨਿਯਮਾਂ ਮੁਤਾਬਕ ਜੇਕਰ ਕਿਸੇ ਵਿਦੇਸ਼ੀ ਕਾਮੇ ਦੀ ਨੌਕਰੀ ਚਲੀ ਜਾਂਦੀ ਹੈ, ਤਾਂ ਉਸ ਨੂੰ ਨਵਾਂ ਰੁਜ਼ਗਾਰ ਲੱਭਣ, ਵੀਜ਼ਾ ਸ਼੍ਰੇਣੀ ਬਦਲਣ ਜਾਂ ਦੇਸ਼ ਛੱਡਣ ਦੀ ਤਿਆਰੀ ਲਈ ਵੱਧ ਤੋਂ ਵੱਧ 60 ਦਿਨਾਂ ਦਾ ਸਮਾਂ ਦਿੱਤਾ ਜਾਂਦਾ ਹੈ। ਨਵੀਂ ਤਜਵੀਜ਼ ਲਾਗੂ ਹੋਣ ਦੀ ਸੂਰਤ ਵਿੱਚ ਕਾਮਿਆਂ ਨੂੰ ਨੌਕਰੀ ਖੁੱਸਦੇ ਸਾਰ ਹੀ ਅਮਰੀਕਾ ਛੱਡਣਾ ਪੈ ਸਕਦਾ ਹੈ।

ਇਹ ਨਿਯਮ ਐੱਚ-1ਬੀ ਤੋਂ ਇਲਾਵਾ ਐੱਲ-1, ਓ-1 ਅਤੇ ਟੀਐੱਨ ਵੀਜ਼ਾ ਧਾਰਕਾਂ ਅਤੇ ਉਨ੍ਹਾਂ ਦੇ ਆਸ਼ਰਿਤਾਂ 'ਤੇ ਵੀ ਲਾਗੂ ਹੁੰਦਾ ਹੈ। 60 ਦਿਨਾਂ ਦੀ ਛੋਟ ਵਾਲਾ ਇਹ ਪ੍ਰਬੰਧ ਸਾਲ 2016 ਦੇ ਇੱਕ ਨਿਯਮ ਰਾਹੀਂ ਲਿਆਂਦਾ ਗਿਆ ਸੀ, ਜੋ ਜਨਵਰੀ 2017 ਵਿੱਚ ਲਾਗੂ ਹੋਇਆ ਸੀ।

ਡਿਪਾਰਟਮੈਂਟ ਆਫ਼ ਹੋਮਲੈਂਡ ਸਕਿਓਰਿਟੀ ਦਾ ਤਰਕ ਹੈ ਕਿ ਵਿਦੇਸ਼ੀ ਕਾਮੇ ਦਾ ਵੀਜ਼ਾ ਦਰਜਾ ਉਸ ਦੀ ਨੌਕਰੀ ਨਾਲ ਸਿੱਧਾ ਜੁੜਿਆ ਹੋਣਾ ਚਾਹੀਦਾ ਹੈ। ਵਿਭਾਗ ਮੁਤਾਬਕ ਇਹ ਮੋਹਲਤ ਕਾਨੂੰਨ ਵੱਲੋਂ ਲਾਜ਼ਮੀ ਨਹੀਂ ਕੀਤੀ ਗਈ ਹੈ ਅਤੇ ਇਸ ਨਾਲ ਵਾਧੂ ਪ੍ਰਸ਼ਾਸਕੀ ਬੋਝ ਪੈਂਦਾ ਹੈ। ਅਕਤੂਬਰ 2017 ਤੋਂ ਮਈ 2026 ਦਰਮਿਆਨ ਅਧਿਕਾਰੀਆਂ ਨੂੰ 19 ਲੱਖ ਤੋਂ ਵੱਧ ਅਰਜ਼ੀਆਂ ਵਿੱਚ ਇਸ ਨਿਯਮ ਦੀ ਜਾਂਚ ਕਰਨੀ ਪਈ ਸੀ।

ਵਿਭਾਗ ਦੇ ਅੰਕੜਿਆਂ ਅਨੁਸਾਰ ਵਿੱਤੀ ਵਰ੍ਹੇ 2021 ਤੋਂ 2025 ਦਰਮਿਆਨ ਹਰ ਸਾਲ ਔਸਤਨ 65,752 ਵਿਦੇਸ਼ੀ ਕਾਮਿਆਂ ਦੀ ਨੌਕਰੀ ਛੁੱਟੀ ਜਾਂ ਬਦਲੀ ਸੀ, ਜਿਨ੍ਹਾਂ ਵਿੱਚੋਂ ਲਗਭਗ 3,795 ਕਾਮਿਆਂ ਨੂੰ ਇਸ ਮੋਹਲਤ ਦੌਰਾਨ ਨਵਾਂ ਰੁਜ਼ਗਾਰਦਾਤਾ ਮਿਲ ਗਿਆ ਸੀ। ਵਿਭਾਗ ਨੇ ਇਹ ਵੀ ਮੰਨਿਆ ਹੈ ਕਿ ਇਸ ਸਹੂਲਤ ਦੇ ਖ਼ਤਮ ਹੋਣ ਨਾਲ ਕਈ ਕਾਮੇ ਬਿਨਾਂ ਕਮਾਈ ਤੋਂ ਰਹਿ ਜਾਣਗੇ ਜਾਂ ਉਨ੍ਹਾਂ ਨੂੰ ਇਮੀਗ੍ਰੇਸ਼ਨ ਕਾਰਵਾਈ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਅਮਰੀਕੀ ਨਾਗਰਿਕਤਾ ਅਤੇ ਇਮੀਗ੍ਰੇਸ਼ਨ ਸੇਵਾਵਾਂ (ਯੂਐੱਸਸੀਆਈਐੱਸ) ਦੀ ਵਿੱਤੀ ਵਰ੍ਹੇ 2025 ਦੀ ਰਿਪੋਰਟ ਮੁਤਾਬਕ ਮਨਜ਼ੂਰ ਹੋਈਆਂ 4,06,348 ਐੱਚ-1ਬੀ ਪਟੀਸ਼ਨਾਂ ਵਿੱਚੋਂ ਲਗਭਗ 70 ਫ਼ੀਸਦੀ ਭਾਰਤ ਵਿੱਚ ਜਨਮੇ ਪੇਸ਼ੇਵਰਾਂ ਦੀਆਂ ਸਨ, ਜਦਕਿ ਚੀਨ ਦਾ ਹਿੱਸਾ ਕਰੀਬ 12 ਫ਼ੀਸਦੀ ਸੀ। ਇਸ ਕਾਰਨ ਕਿਸੇ ਵੀ ਸੰਭਾਵੀ ਬਦਲਾਅ ਦਾ ਸਭ ਤੋਂ ਵੱਡਾ ਸੇਕ ਭਾਰਤੀਆਂ ਨੂੰ ਲੱਗੇਗਾ।

ਜਨਤਾ ਵੱਲੋਂ ਭੇਜੇ ਗਏ ਸਾਰੇ ਸੁਝਾਵਾਂ ਦੀ ਪੜਚੋਲ ਕਰਨ ਤੋਂ ਬਾਅਦ ਹੀ ਵਿਭਾਗ ਅੰਤਿਮ ਫ਼ੈਸਲਾ ਲਵੇਗਾ ਅਤੇ ਨਵਾਂ ਨਿਯਮ ਲਾਗੂ ਕਰਨ ਦੀ ਸਮਾਂ-ਸੀਮਾ ਤੈਅ ਕਰੇਗਾ।

ਅਹਿਮ ਘਟਨਾਕ੍ਰਮ

• ਨੌਕਰੀ ਗੁਆਉਣ ਮਗਰੋਂ ਮਿਲਣ ਵਾਲੀ 60 ਦਿਨਾਂ ਦੀ ਮੋਹਲਤ ਰੱਦ ਕਰਨ ਦੀ ਤਜਵੀਜ਼ 'ਤੇ 31 ਹਜ਼ਾਰ ਤੋਂ ਵੱਧ ਟਿੱਪਣੀਆਂ ਆਈਆਂ।
• ਤਜਵੀਜ਼ ਲਾਗੂ ਹੋਣ 'ਤੇ ਕੰਮ ਛੁੱਟਣ ਸਾਰ ਵਿਦੇਸ਼ੀ ਕਾਮਿਆਂ ਨੂੰ ਅਮਰੀਕਾ ਛੱਡਣਾ ਪੈ ਸਕਦਾ ਹੈ।
• ਅਮਰੀਕਾ ਵਿੱਚ ਐੱਚ-1ਬੀ ਵੀਜ਼ਾ ਹਾਸਲ ਕਰਨ ਵਾਲਿਆਂ ਵਿੱਚ ਕਰੀਬ 70 ਫ਼ੀਸਦੀ ਹਿੱਸਾ ਭਾਰਤੀਆਂ ਦਾ ਹੈ।
• ਡਿਪਾਰਟਮੈਂਟ ਆਫ਼ ਹੋਮਲੈਂਡ ਸਕਿਓਰਿਟੀ ਸਾਰੇ ਜਨਤਕ ਸੁਝਾਵਾਂ ਦੀ ਸਮੀਖਿਆ ਤੋਂ ਬਾਅਦ ਹੀ ਅੰਤਿਮ ਨਿਯਮ ਤੈਅ ਕਰੇਗਾ।