ਹਿਸਾਰ ਏਅਰਪੋਰਟ ‘ਤੇ ਅੱਜ ਤੋਂ ਉਡਾਨ ਯਾਤਰੀ ਕੈਫੇ ਦੀ ਸ਼ੁਰੂਆਤ ਹੋਣ ਜਾ ਰਹੀ ਹੈ। ਇਸ ਕੈਫੇ ਵਿੱਚ ਲੋਕਾਂ ਨੂੰ ਘੱਟ ਕੀਮਤ ‘ਤੇ ਖਾਣ-ਪੀਣ ਦੀਆਂ ਚੀਜ਼ਾਂ ਮੁਹੱਈਆ ਕਰਵਾਈਆਂ ਜਾਣਗੀਆਂ। ਇੱਥੇ ₹10 ਵਿੱਚ ਚਾਹ ਅਤੇ ₹20 ਵਿੱਚ ਸਮੋਸਾ ਮਿਲੇਗਾ। ਇਸ ਦੀ ਸ਼ੁਰੂਆਤ ਅੱਜ ਸਿਵਲ ਏਵੀਏਸ਼ਨ ਮੰਤਰੀ ਵੱਲੋਂ ਚੰਡੀਗੜ੍ਹ ਏਅਰਪੋਰਟ ਤੋਂ ਵਰਚੁਅਲ ਤੌਰ ‘ਤੇ ਕੀਤੀ ਜਾਵੇਗੀ।
ਚਿਹਰਾ ਦਿਖਾ ਕੇ ਹੋਵੇਗੀ ਏਅਰਪੋਰਟ ‘ਤੇ ਐਂਟਰੀ
ਅੱਜ ਤੋਂ ਹੀ ਹਿਸਾਰ ਏਅਰਪੋਰਟ ‘ਤੇ ਡਿਜੀ ਯਾਤਰਾ ਸਹੂਲਤ ਵੀ ਸ਼ੁਰੂ ਕੀਤੀ ਜਾ ਰਹੀ ਹੈ। ਇਸ ਨਾਲ ਯਾਤਰੀ ਚਿਹਰਾ ਦਿਖਾ ਕੇ ਹੀ ਏਅਰਪੋਰਟ ‘ਤੇ ਦਾਖ਼ਲ ਹੋ ਸਕਣਗੇ। ਇਸ ਸਹੂਲਤ ਨਾਲ ਬੋਰਡਿੰਗ ਪਾਸ ਜਾਂ ਆਈਡੀ ਦਿਖਾਉਣ ਦੀ ਲੋੜ ਨਹੀਂ ਪਵੇਗੀ। ਯਾਤਰੀਆਂ ਨੂੰ ਪਲੇ ਸਟੋਰ ਤੋਂ ਡਿਜੀ ਯਾਤਰਾ ਐਪ ਡਾਊਨਲੋਡ ਕਰਕੇ ਆਧਾਰ ਜਾਂ ਮੋਬਾਈਲ ਨੰਬਰ ਨਾਲ ਰਜਿਸਟ੍ਰੇਸ਼ਨ ਕਰਨੀ ਪਵੇਗੀ। ਫਲਾਈਟ ਟਿਕਟ ਅਤੇ ਬੋਰਡਿੰਗ ਪਾਸ ਅਪਲੋਡ ਕਰਨ ‘ਤੇ ਫੇਸ਼ਲ ਰਿਕਗਨਿਸ਼ਨ ਸਿਸਟਮ ਚਿਹਰਾ ਪਛਾਣ ਕੇ ਯਾਤਰੀ ਦੀ ਪਹਿਚਾਣ ਕਰ ਲਏਗਾ।
4 ਤੋਂ 12 ਸਾਲ ਦੇ ਬੱਚਿਆਂ ਲਈ ਕਿਡਜ਼ ਜ਼ੋਨ
ਹਿਸਾਰ ਏਅਰਪੋਰਟ ‘ਤੇ ਅੱਜ ਤੋਂ ਕਿਡਜ਼ ਜ਼ੋਨ ਦੀ ਵੀ ਸ਼ੁਰੂਆਤ ਹੋਵੇਗੀ। ਇਹ ਸਹੂਲਤ ਚੰਡੀਗੜ੍ਹ ਏਅਰਪੋਰਟ ‘ਤੇ ਪਹਿਲਾਂ ਹੀ ਮੌਜੂਦ ਹੈ। ਇਸ ਵਿੱਚ ਸਿਕਿਉਰਿਟੀ ਚੈਕ ਤੋਂ ਬਾਅਦ ਫਲਾਈਟ ਦੀ ਉਡੀਕ ਕਰ ਰਹੇ ਯਾਤਰੀਆਂ ਦੇ ਬੱਚਿਆਂ ਲਈ ਖੇਡਣ ਦੀ ਵਿਵਸਥਾ ਹੋਵੇਗੀ। ਇੱਥੇ ਰੰਗ-ਬਰੰਗੇ ਸਲਾਈਡ ਅਤੇ ਇੰਟਰਐਕਟਿਵ ਗੇਮਾਂ ਦੇ ਨਾਲ ਨਾਲ ਬੈਠਣ ਦੀ ਸਹੂਲਤ ਵੀ ਹੋਵੇਗੀ।
ਫ੍ਰੀ ਵਾਈ-ਫਾਈ ਦੀ ਸਹੂਲਤ
ਏਅਰਪੋਰਟ ‘ਤੇ ਉਡੀਕ ਕਰ ਰਹੇ ਯਾਤਰੀਆਂ ਨੂੰ ਹੁਣ ਮੋਬਾਈਲ ਡਾਟਾ ‘ਤੇ ਨਿਰਭਰ ਨਹੀਂ ਰਹਿਣਾ ਪਵੇਗਾ। ਮੰਤਰੀ ਵੱਲੋਂ ਅੱਜ ਤੋਂ ਹੀ ਹਿਸਾਰ ਏਅਰਪੋਰਟ ‘ਤੇ ਫ੍ਰੀ ਵਾਈ-ਫਾਈ ਸਹੂਲਤ ਦੀ ਸ਼ੁਰੂਆਤ ਕੀਤੀ ਜਾਵੇਗੀ। ਯਾਤਰੀਆਂ ਨੂੰ ਟਿਕਟ ਬੁਕਿੰਗ ਦੇ ਨਾਲ ਹੀ ਵਾਈ-ਫਾਈ ਯੂਜ਼ਰਨੇਮ ਅਤੇ ਪਾਸਵਰਡ ਮਿਲੇਗਾ, ਜਿਸ ਨਾਲ ਉਹ ਮੁਫ਼ਤ ਇੰਟਰਨੈੱਟ ਦੀ ਸੇਵਾ ਲੈ ਸਕਣਗੇ।
